बदनाम होगेन, येदे बदनाम होगेन,
छत्तीसगढ़ म हम मुसवा बदनाम होगेन,2
नइ हे सुनइया, नइ हे समझइया,2
जिंयत जिंयत हम नीलाम होगेन,
छत्तीसगढ़ म हम मुसवा बदनाम होगेन।

बता देना भइया हमर का हे गलती,
सबे मन बदनाम करथो डाहर चलती,
रातभर जागथन हम अलथी कलथी,
तुँहर सेती हम विराम होगेन,
छत्तीसगढ़ म हम मुसवा बदनाम होगेन।

अपन करम ल हमर उपर डारत हो,
बाँचे बर कइसे बाते ल टारत हो,
झूठे झूठ म तुम गोठ ल बघारत हो,
इहाँ रहिके अब हम परशान होगेन,
छत्तीसगढ़ म हम मुसवा बदनाम होगेन।

बने बने करो तुम जाँचे पड़ताल,
इसने म कर देबो हमू मन हड़ताल,
मनखे मन जान डरीस तुँहर चाल,
तुँहर कहानी म हम शैतान होगेन,
छत्तीसगढ़ म हम मुसवा बदनाम होगेन।

खुश झन होवव सबके आहि पारी,
तुंहरो मन बर होही वारेंट जारी,
लुकात फिरहू आने आने दुवारी,
बिना करे गलती बइमान होगेन,
छत्तीसगढ़ म हम मुसवा बदनाम होगेन।

लिखइया- नोकेश तांडे
ग्राम अर्जुनी (गुरूर)